जनशक्ती ( वृत्तसेवा)- नेवासा विधानसभा मतदारसंघातील महाविकास आघाडीचे उमेदवार माजी मंत्री आमदार शंकरराव गडाख यांनी आज (ता.२८) शक्तीप्रदर्शन करत उमेदवारी अर्ज दाखल केला. यावेळी ज्येष्ठ नेते माजी खासदार यशवंतराव गडाख, खासदार भाऊसाहेब वाकचौरे, शिवसेना ठाकरे गटाचे जिल्हाप्रमुख रावसाहेब खेवरे, माजी आमदार पांडुरंग अभंग, अशोक गायकवाड, ॲड. अण्णासाहेब अंबाडे, भेंडा गटाचे माजी जिल्हा परिषद सदस्य दत्तात्रय काळे, रामनाथ महाराज पवार आदी मान्यवरांसह तालुक्यातील शिवसैनिक व महाविकास आघाडीच्या घटक पक्षांचे प्रमुख नेते, कार्यकर्ते मोठ्या संख्येने उपस्थित होते.
उमेदवारी अर्ज दाखल करण्यापूर्वी मेळाव्याचे आयोजन करण्यात आले होते. यावेळी आमदार शंकरराव गडाख म्हणाले, नेवासा तालुक्याच्या सर्वांगिण विकासासाठी शिवसेनेची मशाल घराघरात पोहचवा. महाविकास आघाडीला जसे लोकसभेला यश मिळाले, त्याचप्रमाणे यश या निवडणुकीत मिळणार असून राज्यात पुन्हा महाविकास आघाडीचीच सत्ता येणार आहे. नेवासा येथील राधाकृष्ण मंगल कार्यालयात झालेल्या मेळाव्यानंतर शक्तिप्रदर्शन करत अर्ज दाखल करण्यासाठी कार्यकर्ते मोठ्या संख्येने उपस्थित होते.
