जनशक्ती (वृत्तसेवा)- शिर्डी लोकसभा मतदारसंघाचे नवनिर्वाचित खासदार भाऊसाहेब वाकचौरे यांनी आपल्या कामाची कार्यतत्परता दाखवत नेवासा तालुक्यातील पाऊस व वाऱ्यामुळे झालेल्या पीक व फळबागांच्या नुकसानीचे त्वरित पंचनामे करण्याचे आदेश नेवासा तहसीलदारांना दिले आहे. दोन दिवसापूर्वी खासदारपदी निवड झाली, सत्कार समारंभ शुभेच्छांचा ओघ चालू असताना शेतकरी वर्गावर आलेल्या संकटाची जाण ठेवून सत्कार समारंभ बाजूला करत प्रथम त्या प्रश्नांवर लक्ष वेधून नेवासा तहसीलदारांना आदेश दिले आहेत,अशी माहिती खासदार भाऊसाहेब वाकचौरे यांचे स्विय सहाय्यक बाळासाहेब सोनवणे यांनी दिली. खासदार वाकचौरे यांनी सत्कार समारंभात न रमता फळबागासह शेतीपिकांचे नुकसान झालेल्या शेतकऱ्यांच्या पिकांचे पंचनामे करण्याचे आदेश नेवासे तहसीलदार यांना दिल्याने नेवासा तालुक्यातील नुकसानग्रस्त शेतकरी व महाविकास आघाडीच्या कार्यकर्त्यांनी खासदार वाकचौरे यांचे आभार मानले आहेत.
