जनशक्ती (वृत्तसेवा)- दिपावली हा सण आनंदाचा, उत्साहाचा आणि दिव्यांचा सण म्हणून ओळखला जातो. दिवाळीचा सण हा देशभरात मोठ्या उत्साहात आणि थाटामाटात साजरा केला जातो. दिवाळी ही पाच दिवसांची असून नरक चतुर्दशी, लक्ष्मी पूजन, दिवाळी पाडवा, गोवर्धन पूजा आणि भाऊबीज या सणांना विशेष महत्त्व आहे. तर महाराष्ट्रात दिवाळीचा सण हा आश्विन महिन्यातील कृष्ण पक्षातील द्वादशी तिथिपासून सुरु होतो. दिवाळीच्या सणात लक्ष्मीपूजनाला अधिक महत्त्व आहे. यंदा लक्ष्मी पूजनाचा मुहूर्त हा दोन दिवसांचा असणार आहे. 
यावर्षी लक्ष्मीपूजन नेमकं कधी करायचं? योग्य तिथी व पूजा विधी काय आहे, याबाबत सविस्तर माहिती जाणून घेऊया.धनत्रयोदशी म्हणजेच धनतेरसपासून दिवाळीला सुरुवात होते. मग नरक चतुर्दशी म्हणजे दिवाळीचा पहिली आंघोळ केली जाते. या सणाला छोटी दिवाळी असंही म्हणतात. यंदा दिवाळी म्हणजे लक्ष्मीपूजनच्या तारखेबद्दल संभ्रम निर्माण झाला आहे. काहींच्या म्हणण्यानूसार यंदा दिवाळी 31 ऑक्टोबरला आहे, तर काहीजण 1 नोव्हेंबरला दिवाळी आहे, असं म्हणत आहेत. दोन दिवस प्रदोष काळात अमावस्या तिथी आल्यामुळे हा सर्व गोंधळ झाला आहे. महाराष्ट्रात लक्ष्मीपूजन कधी करायचं, याबाबत पंचांगकर्ते व खगोल अभ्यासक यांच्या माहितीनुसार अधिकृत माहिती समोर आली आहे. आश्विन महिन्यातील अमावस्या तिथीला दिवाळीचा सण साजरा करण्यात येतो. पंचांगानुसार अमावस्या तिथी 31 ऑक्टोबर रोजी दुपारी 3 वाजून 12 मिनिटापासून 1 नोव्हेंबरला संध्याकाळी 5 वाजून 53 मिनिटापर्यंत असणार आहे. त्यासोबत प्रदोष काळ आणि वृषभ काळ हे दोन शुभ काळ दिवाळीत पूजेसाठी महत्वाचे आहेत. ज्योतिष शास्त्रानुसार प्रदोष आणि वृषभ काळात दिवाळी पूजा किंवा लक्ष्मी पूजा करणे खूप शुभ मानले जाते.दोन दिवस प्रदोषकाळी आश्विन अमावास्या कमी-अधिक प्रमाणात असली तरी लक्ष्मी-कुबेरपूजन दुसऱ्या दिवशी प्रदोषकालात करावे, असे धर्मसिंधू, पुरुषार्थ चिंतामणी, तिथिनिर्णय, व्रतपर्व विवेक इत्यादी अनेक धर्मशास्त्रीय ग्रंथात दिले आहे. काही ज्योतिषशास्त्र तज्ज्ञ सांगतात जर तुम्हाला अमावस्या तिथीमध्येच शुक्रवारी 1 नोव्हेंबरला लक्ष्मीपूजन करायचं असेल तर 5 वाजून 53 मिनिटापर्यंतच करावं लागणार आहे. 1962, 1963 आणि 2013 मध्येही दोन दिवस प्रदोषकालात अश्विन अमावस्या आली होती. त्यावेळीही दुसऱ्या दिवशी लक्ष्मी-कुबेर पूजन केलं होतं असं पंचांगकर्ते, खगोल अभ्यासकांनी सांगितले आहे.
👉लक्ष्मी पूजनासाठी शुभ मुहूर्त अमावस्या काळात – संध्याकाळी 5:36 ते 6:15 पर्यंत
👉प्रदोष काळात लक्ष्मी पूजनासाठी शुभ मुहूर्त – संध्याकाळी 5:35 ते रात्री 08.06 पर्यंत
👉 असे करावे लक्ष्मीपूजन-
लक्ष्मीपूजन विधी करण्याकरिता सर्वप्रथम देवघरामध्ये एक चौरंग ठेवावा, त्यावर लाल कापड अंथरून घ्यावा. त्यावर उजव्या बाजूला कळस मांडावा. त्या कळसांमध्ये पाच विड्याची पाने टाकावी, एक रुपयाची नाणी टाकावे आणि कळसाच्या वर नारळ ठेवावा त्या नारळाची शेंडी वर असली पाहिजे. आपण जो चौरंग घेतला आहे, त्या चौरंग वर मध्यभागी तांदुळाची रास करावी. त्यावर गणपती, कुबेर, लक्ष्मी यांची मूर्ती किंवा फोटो ठेवावा. जर तुमच्याकडे काहीच नसेल तर सुपारी ठेऊ शकतात. त्यानंतर चौरंगावर जागा शिल्लक असेल त्या जागेमध्ये हिशोबाची वही आणि पेन ठेवावी तसंच पैसे नाणी ठेवावे. त्यानंतर चौरंगाची हळद कुंकू लावून पूजा करून घ्यावी. फराळ आणि लाह्या बताशे यांचा नैवेद्य दाखवावा. झाडूला लक्ष्मी मानतात म्हणून नवीन झाडूची पूजा केली जाते.
