कोण होणार खासदार? निकाल काही तासांवर

जनशक्ती (वृत्तसेवा)- लोकसभा निवडणूकीचा निकाल काही तासांवर येऊन ठेपला आहे. देशातील 543 लोकसभा मतदारसंघात आणि त्यापैकी महाराष्ट्रातील 48 जागांवर कोण बाजी मारणार उद्या (ता.4) स्पष्ट होईल. नगर जिल्ह्यातील नगर व शिर्डी लोकसभेच्या खासदारपदी कोणाची वर्णी लागते, हे उद्या स्पष्ट होईल. नगर, शिर्डी लोकसभा मतदारसंघासाठी नगर एमआयडीसी वखार महामंडळ येथे सकाळी ८ वाजता मतमाेजणी सुरू हाेणार आहे. देशात 7 टप्प्यात तर महाराष्ट्रातील 48 मतदारसंघात 5 टप्प्यात मतदान झाले. महाराष्ट्रात एकूण 60.78 टक्के मतदानाची नोंद झाली. महाराष्ट्रात पहिल्या टप्प्यात सर्वाधिक 63.71 टक्के मतदान झालं, तर दुसऱ्या टप्प्यात 62.71 टक्के मतदानाची नोंद झाली.सार्वत्रिक लोकसभा निवडणूक महाराष्ट्रात पाच टप्प्यात घेण्यात आली असून या निवडणुकीची मतमोजणी राज्यातील 48 मतदार संघात उद्या मंगळवारी (दि. 4) सकाळी आठ वाजल्यापासून सुरू होणार आहे. ही संपूर्ण प्रक्रिया सुरळीत आणि पारदर्शक पद्धतीने होण्याच्या दृष्टीने यंत्रणा सर्व तयारीनिशी सज्ज असल्याची माहिती मुख्य निवडणूक अधिकारी कार्यालयाने दिली आहे. मतमोजणीसाठी यंत्रणा सज्ज असल्याचे देखील सांगण्यात आले आहे. राज्यात उद्या गैरप्रकार टाळण्यासाठी चोख बंदोबस्त ठेवण्यात आला आहे. राज्यातील 48 मतदार संघातील मतमोजणी केंद्रावर एकूण 14 हजार 507 अधिकारी-कर्मचारी नियुक्त करण्यात आले आहेत. एकूण 289 हॉल मध्ये 4309 मतमोजणी टेबलची व्यवस्था करण्यात आली आहे. कायदा आणि सुव्यवस्था अबाधित राखण्यासाठी चोख पोलीस बंदोबस्त सर्व मतदान केंद्रावर उपलब्ध करून देण्यात आला आहे.