बालाजी देडगाव (प्रतिनिधी)- जिल्हा परिषद प्राथमिक शाळा देडगाव येथे जागतिक योग दिन उत्साहात साजरा करण्यात आला. या कार्यक्रमाचे आयोजन जिल्हा परिषद प्राथमिक शाळा व कृषी महाविद्यालय भानसहिवरे अंतर्गत कार्यरत असलेल्या कृषीदूतांच्या संयुक्त विद्यमाने करण्यात आले होते.
कार्यक्रमाची सुरुवात सूर्यनमस्कार व ओम उच्चाराने करण्यात आली. विद्यार्थ्यांसह ग्रामस्थ, शिक्षक व कृषीदूतांनी विविध योगासने केली. योग प्रशिक्षक म्हणून धामणे सर आणि कृषीदूतांनी मार्गदर्शन केले व योगाचे शारीरिक व मानसिक आरोग्यावर होणारे फायदे याबाबत सविस्तर माहिती दिली.
शाळेचे मुख्याध्यापक सतिशकुमार भोसले व योग प्रशिक्षक धामणे सर यांनी विद्यार्थ्यांना नियमित योगाभ्यासाचे महत्त्व पटवून दिले. कृषीदूतांनी ग्रामीण भागातील लोकांमध्ये आरोग्यविषयक जनजागृती करण्याचे उद्दिष्ट ठेवून हा उपक्रम हाती घेतला. कार्यक्रमाच्या यशस्वी आयोजनाबद्दल ग्रामस्थांनी कृषीदूतांचे व शाळेच्या शिक्षकवृंदांचे अभिनंदन केले.
