कुकाणा (प्रतिनिधी)- नेवासा तालुक्यातील कुकाणा येथील नाभिक समाजाचे ज्येष्ठ कार्यकर्ते, स्वागत मेन्स पार्लरचे मालक व ज्येष्ठ वृत्तपत्र विक्रेते रंगनाथ गंगाराम पंडित यांचे रविवार दि.७ रोजी वृद्धापकाळाने निधन झाले. ते ८८ वर्षाचे होते. ते अतिशय मनमिळावू, शांत स्वभावाचे होते तर धार्मिक व सामाजिक कार्यात ते नेहमी अग्रभागी असायचे. कुकाणा व परिसरात ते अण्णा म्हणून सर्वांच्या परिचीत होते. नाभिक समाजाबरोबर विविध समाजामध्ये विवाह जमवण्यासाठी त्यांचा मोठा सहभाग होता. तर त्यांनी शंभरहून अधिक विवाह जमवले. त्यांच्या जाण्याने नाभिक समाजाचे एक आदर्श व मार्गदर्शक व्यक्तीमत्व हरपले. त्यांना दोनदा आदर्श वृत्तपत्र विक्रेते म्हणून सन्मानित करण्यात आले होते. त्यांच्या अंत्यविधी प्रसंगी सर्व क्षेत्रातील पदाधिकाऱ्यासह मोठा जनसमुदाय उपस्थित होता. त्यांच्या पश्चात तीन मुले, सुना, एक विवाहित मुलगी, नातवंडे , नातजावई असा मोठा परिवार होता. वृत्तपत्रे विक्रेते अनिल पंडित, भारत पंडित व पाथरवाला माध्यमिक विद्यालयाचे ज्येष्ठ शिक्षक व पत्रकार सुनिल पंडित यांचे ते वडील होत.
