बालाजी देडगाव (प्रतिनिधी)- मुळा एज्युकेशन सोसायटीचे, कला, वाणिज्य व विज्ञान महाविद्यालयात राष्ट्रीय सेवा योजना, रेड रीबन क्लब व ग्रामीण रुग्णालय, घोडेगाव यांच्या संयुक्त विद्यमाने जागतिक एड्स पंधरवाडा दिनानिमित्त घोडेगाव ग्रामीण रुग्णालयाचे समुपदेशक दीपक पंजाबी यांनी एड्स जनजागृती व उपचारामध्ये महाराष्ट्र देशात अग्रेसर असल्याचे नमूद केले. एड्स संदर्भात काही समज गैरसमज कसे आहेत याबद्दल माहिती देवून हा आजार होऊ नये, त्यासाठी कोणती काळजी घेतली पाहिजे या संदर्भात सविस्तर मार्गदर्शन केले.
अध्यक्षीय भाषणात महाविद्यालयाचे प्राचार्य डॉ. भानुदास चोपडे म्हणाले, एचआयव्ही संदर्भात योग्य काळजी घेतली तर एचआयव्हीवर मात करणे शक्य आहे. कार्यक्रमाचे प्रास्ताविक डॉ. अमोल दहातोंडे यांनी केले. तसेच राष्ट्रीय सेवा योजनेचे सहकार्यक्रम अधिकारी प्रा. भक्ती बजांगे यांनी सूत्रसंचालन केले. तर आभार सहकार्यक्रम अधिकारी प्रा. प्राजक्ता गायके यांनी मानले. याप्रसंगी महाविद्यालयातील विद्यार्थी, प्राध्यापक, प्राध्यापकेत्तर सेवक मोठ्या संख्येने उपस्थित होते.
